30 marzo 2015

El Molin de Villaescusa


En Villaescusa hai un antigu molín de pisar llamau tamién, pison, molín de rabil ó de rabilar, la so función  nun yera moler el granu y convertilo en fariña, sinón que yera descascarillar el granu de centenu ó escanda, ye dicir separar el granu de la so envoltura herbal llamada poxa, esti molín funcionaba movíu pola fuerza humana, a cada llau del molín hai un gran rabil de fierru que mueven una gran rueda dentada fecha de fierru y mdera asitiada en posición vertical qu'engrana con una especie de xaula fecha tamien de madera a manera de piñón que tresmite'l movimientu a la muela móvil del molín, a lo cimero del molín esta la monxeca, que ye una especie de caxón anchu penriba y estrechu per baxu onde s'echaba'l granu que diba cayendo pocu a pocu ente los dos muelas del molín la fija y la móvil.

Yo nun recuerdo velu nunca funcionar de forma práctica, pero según me cuntáron persones mayores yá sumíes el so funcionamientu yera más o menos el siguiente, una o dos persones xeneralmente muyeres, asitiábense a lo cimero del molín al llau de la monxeca, onde diben echando'l granu, otros dos, n'esti casu homes, asitiaos unu a cada llau del molín movíen los rabiles de les qu'antes fale y facíen funcionar el molín, el trabayu d'estos dos homes yera bien duru polo que mientres estos movíen el molín otros dos esperaben pa facer frecuentes relevos, otra persona yera la encargada de dir recoyendo'l granu yá llimpiu que salía del molín y ir echandolo en cestos o sacos, como pue vese pa faer funcionar el molín precisábense 6 o 7 persones.

Esti molín nun yera propiedá de nenguna persona en concretu, sinón que yera de tolos vecinos y funcionaba pol métodu de la vecería, esto ye, cada día unu o más vecinos teníen vez pa utilizar el molín, si quedaben díes llibres otres persones de los pueblos cercanos podíen utilizalo, nesti casu en cuenta de una prestación en dineru o n'especie.                      
Por cuenta de la falta d'usu y de un dueñu concretu, esti molín foise deteriorando, hasta casi sumir,  va dellos años fíxose-y una restauración, retéyose'l teyáu que lu cubre y sustituyéronse les partes estropiaes del molín, pero de nuevu la falta de cuidau y caltenimientu fai que vuelva tar bastante deterioráu.
Supongo que'l futuru d'esti molín va ser la so desapaición lo mesmo qu'asocede con una gran panera qu'hai al so llau, al igual qu'otros munchos artiluxos de diversa índole abandonaos nos nuesos pueblos, sería necesariu que daquién tomara cartes nel asuntu y se tratára protexer y caltener esti patrimoniu que nel so día emprestó serviciu a los nuesos antepasaos y que forma parte de la nuesa hestoria.



No hay comentarios: