martes, 26 de abril de 2011

Primer viaxe a Uviéu d'un rapaz de Villaescusa

Esti relatu cunta de forma resumia les experiencies d'un rapaz de Villaescusa cuando realizo'l so primer viaxe dende Villaescusa a Uviéu cuando tenia nueve ó diez años.
Esto sucedio nos ultimos años de la decada de los cincuenta del pasáu sieglu XX, n'aquella epoca la xente de los pueblos viaxaba mas bien pocu, pos estos y en concretu Villaescusa taben bastante aisllaos, yá que dir dende Villaescusa a Uviéu ó Xixón podia convertise en toa una odisea, como vamos ver mas adelente nesti relatu.

La vida d'esti rapaz en Villaescusa trascurría de forma bastante monótona, diariamente asistía a les clases que se impartían na escuela pública de Pernús y dempués de tornar de la escuela ayudaba en casa no que podía, bien curiando les vaques, diendo per agua a la fuente, ó realizando cualesquier otra cosa que estuviera al so alcance.

Una tardi que taba col so padre atropando la pación esti díxo-y, dientro d'unos dis tengo que dir a Uviéu y pense qu'al meyor gustaríate dir conmigo, el rapaz aína contésto-y, que si que-y gustaría dir con él, darréu empezó a pregunta-y a so padre coses del futuru viaxe, ¿papa onde esta Uviéu?, ¿papa en que vamos dir a Uviéu?, el so padre díxo-y qu'Uviéu yera una ciudá bien grande y que taba bien llueñe, que'l día del viaxe tendríen que madrugar enforma, que tendrian que baxar caminando dende Villaescusa hasta el Puente Agüera, ellí cogerian el coche de llínea que los llevaría hasta Infiestu, onde cogerían el tren que los llevaría hasta Uviéu.

Los díes que pasaron ente l'anunciu del viaxe y la realización del mesmu fueron un continuo imaxinar per parte del rapaz sobre como seria'l viaxe, como seria'l tren, que'l nunca había vistu, como seria Uviéu, en fin qu'aquello superabalu y yera pa el una gran aventura.

Al fin llego'l día del viaxe, y como el so padre le dixéra, llevantáronse bien tempranu, cuando salieron de casa tovia yera de nueche, baxaron caminando dende Villaescusa hasta'l Roblón pel camín que pasaba pe La Llosa Villaescusa, El Collau, el Parea Caliente, La Indiana, El Prau Roscu, hasta llegar al Roblón y dende ellí pasando pel Molin del Vicenton, hasta el Puente Agüera, cuando llegaron empezaba a amanecer, ellí esperaron a que llegara'l coche d'Amador (mas tarde autocares costa verde) que facian la ruta Colunga-Infiestu, tomaron el coche de llínea y pocu a pocu y parando en tolos pueblos pa recoyer xente  llevolos  hasta Infiestu


Una vez en Infiestu fueron corriendo a la estación del tren, pos tenían el tiempu xustu, na estación al rapaz llámo-y munchu l'atención un home con gorra que taba detrás d'una pequena ventana, yera'l qu'espachaba los billetes, coyeron los billetes y de siguío pasaron al anden onde taben les víes poles que tenia que venir el tren, tando ellí esperando'l rapaz comenzó a escuchar un gran ruiu, miró y vio venir daqué bien grande echando fumu negru y xiblando, la so primer reacción foi garrase al so padre y pregunta-y “¿que ye eso papa?” “¿Qué ye eso papa?”, el so padre asélolu y díxo-y qu'aquello yera'l tren, cuando llego párose y padre y fíu xubieron al tren, al poco tiempu xiblo de nuevu y volvio a entamar la marcha escontra Uviéu, aína entro nel vagón otru home con gorra y uniforme, que dicía “billetes por favor", "billetes por favor” el rapaz pensaba que yera un guardia pero'l so padre díxo-y que yera'l revisor cuando llego a onde taben ellos cogio los sos billetes y con una especie d'alicates que llevaba na mano fíxo-yos un furacu, pa esti rapaz tou aquello yera dafechu nuevu y desconocíu, llego un momentu que non sabia si seria realidá ó taría suañando.

Dempués de dos hores de viaxe, al fin llegaron a Uviéu, baxaron del tren y salieron de la estación, pal rapaz aquello si que yera nuevu, tanta xente, los coches, los edificios les cais, los guardias que dirixíen el traficu, en fin una aventura total pa el.

Lo primeru que fixeron foi dir al Institutu Nacional de Previsión INP, onde'l so padre tenía que facer unes xestiones, les cuales yeren el motivu del viaxe, l'edificiu del INP taba y ta na plaza del Carbayón, güei ye la sede central del SESPA, Servicios Sanitarios del Principáu d'Asturies.


Cuando'l so padre termino de realizar les xestiones nel INP, fueron al Campu de San Francisco, pal rapaz aquello yera un paisaxe munchu mas conociu pos había árboles, fontes y prau, coses que-y yeren munchu mas familiares, recuerda que nel Campu de San Francisco, pudo ver per primera vez un osu, yera la osa Petra, que vivía nuna xaula dientro del Campu de San Francisco, el so padre díxo-y qu'antes la osa Petra tenia un compañeru que se llamaba Perico, pero que se morriera facia pocu tiempu, tambien recuerda qu'ellí tuvo viendo una gran xaula con munches especies de páxaros y tamién vio per primer vez los pavos reales, unu d'ellos dio-y un terrible plasmu cuando cerca del esplegó la so cola y empezó a glayar con fuerza

Hacia la una de la tardi regresaron a la estación del tren, nel chigre de dicha estación tuvieron comiendo y a las trés de la tardi garraron el tren pa faer el viaxe de regresu escontra Infiestu, a onde llegaron alredor de los cinco de la tardi y dende ellí nel coche de llínea hasta'l Puente Agüera a onde llegaron alredor de las siete de la tardi, doce hores dempués de partir, dende Agüera y dempués d'una pequena parada nel chigre de Ricardo, empezaron a xubir caminando escontra Villaescusa, utilizándo'l mesmu camin qu'a la ida

Mas o menos d'esta forma trascurrió el primer viaxe d'esti rapaz dende Villaescusa a Uviéu, toa una aventura pa el, de la que guarda bones alcordances.

Trescurríos unos años, esti rapaz, como tantos otros d'aquellos años, abandono Villaescusa el pueblu onde habia nacíu y treslládose a vivir precisamente a Uviéu onde afitaría la so residencia y onde trascurriría la so vida personal y profesional hasta'l día de güei.

No hay comentarios: