lunes, 6 de agosto de 2012

Villascusa y Pernús nos años 50 y 60 del pasau siglu XX

Ilesia de Pernús
Villascusa pertenez política y administrativamente a la parroquia de Pernús y al conceyu de Colunga, non asi no tocante a la relación cola ilesia católica que pertenez a la parroquia de Santoxenia  los Pandos, nel vecín conceyu de Villaviciosa.

La principal relación de la xente de Villascusa con Pernús era la escuela, hasta que se realizo la concentración escolar, nos últimos años de la década de los 70, tolos nacíos en Villascusa asistimos a les clases que s'impartíen na escuela de Pernús, meyor dichu nes  escueles de Pernús, pos había dos escueles, una de nenos y otra de nenes, coles sos correspondientes viviendes pa los maestros. 

Na mio dómina, (últimos años de la década de los 50 y primeros de la década de los 60 del pasáu sieglu XX) la escuela de nenes taba al cargu de una maestra que se llamaba Dña. Josefina, que era muy quería y respetada por tola xente de la zona pola so forma d'impartir les clases y pol so tratu bonable al empar que respetuosu con toos.

De la escuela de nenos a la que yo asistí, alcuerdome del mio primer maestru que se llamaba D. Gregorio, yo era pequenu y alcuerdome qu'él falaba a voces,  ó a mi paeciamelo, po lo que yo tenía-y muchu mieu,  mas tardi fui sustituíu por otru maestru que se llamaba D. Manuel, que tuvo bien pocu tiempu, hasta que llego D. Raimundo Tejeiro, esti tuvo en Pernús dellos cursos y ye del que meyor alcordanza tengo pos era un maestru que tenia verdaderu interés en que los nenos adquirieren conocencies y él,  implicábase nello.

Pa dir dende Villascusa a Pernús, había bien malos caminos y pel inviernu poníense intransitables pa nenos de 7, 8 ó 9 años, por ello había unes sendes que diben de prau en prau, una por La Muezca y La Tura, otra pel  Bustiu y otra per Miravete.
Escuelas de Pernús

Dellos vecinos de Villascusa baxaben los xueves a Pernús a coyer l'autobús pa dir al mercáu a Colunga, cuando daquién de Villascusa tenía que facer dalgún viaxe a Uviéu ó Xixón era abondo frecuente dir coyer el ALSA al Chisquillo, pa ello había que baxar hasta Pernús y siguir pasando por Cabrafiu, hasta'l Chisquillo na carretera N-632, onde l'autobús de ALSA tenía una parada.

Tamién había en Pernus un molín (la molinera de Miyar), esti molín nun era movíu poles agües de nengún riu, sinón que era un molín eléctricu, delles persones de Villascusa baxaben a Pernús a moler el maíz nesti molín, sobremanera en dómina de sequia, cuando los molinos hidráulicos teníen dificultaes per falta d'agua.

Cuando había dalguna campaña de vacunación ó saneamientu d'animales, el veterinariu de Colunga averaravase a Pernús y la xente de tolos pueblos de la parroquia incluyíu Villascusa allegaben colos sos animales pa facer efectiva la vacunación, como por casu, na campaña anual de vacunación de los perros contra la rabia.
Mas ó menos d'esta manera y grandes rasgos, era como se desenvolvíen les relaciones ente Villascusa y Pernús, naquellos yá lexanos tiempos, tou ello basáu nes mios propies alcordances y vivencies y polo tantu suxetu a errores po los que de antemano pido disculpes.





No hay comentarios: