Vamos hablar hoy d'un llabor ralacionau col cultivu del maíz y que col pasu del tiempu y les nueves formes de vida fui perdiéndose hasta llegar praticamente a desaparecer, esti llabor consistía en quitar les fueyes que cubríen les panoyes del maíz dexando dalgunes pa entretejerlas ente si formando les riestres, esti llabor en Villaescusa y n'otros pueblos del conceyu de Colunga llamábase la esbilla, n'otros llugares d'Asturies llámase-y la esfoyaza, el esfoyon, etc. La esbilla faciase xeneralmente pe la noche y pol procedimientu de la andecha, por esti procedimientu tolos vecinos d'un pueblu o parte dellos, facien estos llabores conjuntamente, cada nueche todos diben a esbillar maíz pa un dellos.
Nel mes d'octubre era cuando se recoyía'l maíz, les panoyes llevavanse a la casa onde se facia un gran montón, pela noche, dempues de cenar, tolos vecinos axuntabense na casa del vecín qu'esa noche facia la esbilla, la mayoría sentábense alredor del montón y empezaben a esbillar les panoyes, ye dicir a quitar les fueyes que cubrien les panoyes, dexando dos o tres fueyes, les más fuertes y diben echandoles a lo alto del montón, onde s'asitiaben los enriestradores que diben garrando les panoyes esbillaes y diben faciendo con elles les riestres.
Mientres duraba la esbilla los que participaben nella falaben de de munches coses, comentaben el día a día de les coses qu'asocedíen nel pueblu, o nos pueblos cercanos, dacuando cuntaben cuentos, chistes, refranes, etc. y los xóvenes, mozos y moces, aprovechaben tamien la esbilla pa cortexar, tou esto facia qu'amás de facer el trabayu, la esbilla convirtierase nuna reunión de vecinos amena y entretenia.
Cuando se terminaba la esbilla, si la casa tenia corredor, colgabense del mesmu les riestres de panoyes, pa ello cada riestra era coyida ente dos o tres persones y xubíense al corredor onde se colgaben, si la casa non tenia corredor, les riestras dexábense preparaes pa colgales a otru día de la tenobia del horru.
El día que se celebraba la ultima esbilla en casa de cada vecín y al terminar la mesma, esti ofrecia a los sos convecinos un pequenu convite que se llamaba la garulla, nel ofreciense diversos productos como, nueces, castañes y manzanes asaes, galletes, pasteles etc., acompañaos de vino, sidre, vino dulce, café y licores.
Mas o menos desta manera ye como yo recuerdo, estes reuniones de xente pa facer esti llabor llamau la esbilla.
Que bien paez el maiz
esbillau y enrrestrau
colos graninos al aire
de la panera colgau
No hay comentarios:
Publicar un comentario