La Sextaferia en Villaescusa

De Sextaferia

La Sextaferia yera una contribución obligada de tolos vecinos d'un pueblu ó aldea emprestada en foma de trabayos a la comunidá, de los que d'una u otra manera todos salíen beneficiaos, celebrábase xeneralmente los vienres y nella reparábense caminos, fontes, bebederos, cortábense les sebies de les finques que daben escontra los caminos públicos, podabense ó cortabense dellos árboles qu'estorbaben y realizábase cualesquier otru trabayu que fora necesariu pa caltener lo mas axeitáu posible'l pueblu y les sos víes de comunicación que yeren los caminos.

En Villaescusa l'encargáu de llamar a Sextaferia yera l'alcalde de barriu, que yera un vecín del pueblu qu'ostentaba nel mesmu la representación del alcalde del conceyu, nesti casu del alcalde de Colunga. Solía axuntase col restu de los vecinos p'alcordar que trabayos yeren más prioritarios y una vez  alcordaos acometelos na próxima Sextaferia.

L'alcalde de barriu yera tamién l'encargáu de curiar y caltener en perfectu estau les  ferramientes que s'usaben na Sextaferia, que solíen ser  propiedá del pueblu ó del conceyu, estes ferramientes yeren dellos picos y pales, les maces y los pistolos, garabatos, rastrillos, fesorises, focetes, hachos, guadañes, etc. etc.

El día de Sextaferia, a les nueve la mañana, tolos vecinos, diben escontra la casa del alcalde de barriu, ellí cada unu coyía una ó delles ferramientes y dende ellí toos xuntos dirixinse a facer los trabayos alcordaos pa esi día

La Sestaferia como cosa reglada y obligada quedo abolia fai abondo tiempo, no obstante na actualida, los vecinos de dellos pueblos, ó llugares cuando ye necesariu realizar dellos trabayos de meyora ó adecentamientu de los mesmos, entamen de forma voluntaria una Sestaferia y ente toos facen los trabayos en beneficiu de toos.