Cortobeyu

Cortobeyu, ye un llugar asitiáu al sur de Villaescusa, nel camín que d'antiguo baxaba dende Villaescusa hasta la Riega Bucial, na carretera AS-330, que une El Puete Agüera con Villaviciosa, en los ultimos años  50 y primeros 60 del pasu siglu XX, vivien en Cortobeyu  una familia formada por Pepe y Amelia que teníen dos fies que se llamaben Carmina y Maruja, alcuerdme qu'ellí vivien tamién dos muyeres yá mayores, que yeren hermanes, una llamábase Carola y l'otra Segunda, nun sé muy bien cuál yera la relación ente estes dos muyeres y los demás miembros de la familia, pero creo que yeren tíes de Pepe. Mas d'antiguo vivió en Cortobeyu, un tal Xuan de Cortobeyu, que según paez yera un paisanu dotau de unes cualidaes fisiques extraodinaries, d'él dicíase que nuna ocasión había idu y vueltu caminando a Uviéu nel mesmu día y calzando madreñes a pures, ye dicir ensin zapatielles nin escarpinos, esto paez dificil de creer, pero bueno, yo tampocu lo descartaria y si nun foi y vinu nun día, pero fizolo en dos, la hazaña seria igualmente impresionante. Cerca de Cortobeyu hay un llugar llamau Les Cubiles, nesti llugar, y según cuntaba una vieya leyenda, había un tesoro escondiu “el tesoro de Les Cubiles”, que habien dexau ellí los moros cuando fueren expulsaos de la zona.

Cortobeyu quedo deshabitau, fai aproximadamente 35 años, va unos meses y por motivos que nun vienen al casu, tuvi en Cortobeyu y tome estes fotografíes, nelles podemos ver l'estáu actual d'esti llugar, totalmente en ruines y cubiertu pola maleza, desgraciadamente como otros munchos llugares qu'un día no tan lexanu rebosaben vida y güei tán nel olvidu.