La matanza’l gochu era
una de les tradiciones más populares nos
pueblos y aldees d'Asturies, en cada casa del pueblu matabase un gochu que era una despensa de proteínes animales durante to'l añu. Hoy voi falar de cómo recuerdo yo la matanza del gochu nel pueblu de Villascusa y n'otros pueblos del conceyu de
Colunga, que con algunes variantes era similar a como se facia en tolos pueblos
d'Asturies.
Pel mes de xineru o febreru mercabase un gochu pequenu pa
crialo durante tol añu hasta que llegara'l tiempu de la matanza. Los primeros meses
de vida del gochu alimentabase coles sobres de la comida, la esllaba, con
castañes y con daqué de fariña de maíz,
munches veces soltabase polos caminos o dellos praos onde pastiaba y
exercitábase con cuenta de que les sos carnes fueren más prietes, dos meses antes
de la matanza empezabase a cebar el gochu de forma intensiva pa qu'engordara y coyera tocín.
La matanza’l gochu era
tou un ritual, nella participaben los familiares y los vecinos mas cercanos a
la casa que facia’l matanciu, el día anterior preparábase la desca que era un
caxón allargáu fechu de madera y asitiábase pámpana abaxu cerca del cubil del
gochu, a otru día pela mañana, dellos homes, cuatro o cinco, coyíen al gochu tumbabenlu y suxetabenlu
sobre la desca y el matador provistu d'un gran cuchiellu, llamáu cuchiellu de
matar, daba en corar al gochu y una muyer xeneralmente la muyer de la casa,
provista d'un gran barcal recoyía la sangre del gochu que más tardi s'utilizaría na ellaboración de les
morcielles. Una vez muertu'l gochu asitiábase dientro de la desca y echábense
sobre'l varios calderos d'agua ferviendo pa
pelalu, una vez perfeutamente
peláu, colgase peles pates traseres d'una pasera y abriase el so banduyu pa
saca-y los intestinos y toles coraes, la muyer de la casa ayudada por otres
muyeres vecines llavaben les tripes pa
utilizales dempues na ellaboración de los chorizos les morcielles y los
sabadiegos, agora dexábase'l gochu colgáu de la pasera y nun llugar frescu y a cubiertu pa
qu'esfreciera y serenare.
A otru día cuando'l gochu yá taba friu comenzabase a
despiezar, esto llamábase despostar el gochu, una persona más o menos entendia,
diba sacándo-y los xamones, los llacones, el llombu, el sollombu, les
costielles, el tocín, etc. Los xamones, los llacones, parte del tocín y de la
carne salábase metiéndolo nun caxón o arca y cubriendolo con sal, esta era la
manera de caltenelo durante tol añu, con otra parte de de la carne, la de meyor
calidá y parte del tocín facíense los chorizos, cola carne de peor calidá daqué
de grasa y tocín facíense los sabadiegos y co la sangre, la grasa, cebolla y
calabazón facíense les morcielles-
Tos estos embutios había que curalos pa que se conservaren el mayor tiempo posible,
pa ello colgabense nun llugar deshabitau onde se facia un fueu y col calor y el
fumu ibense secando y ahumando.
Como pue vese na matanza’l gochu collaboraben los vecinos más cercanos a
la casa que mataba'l gochu y era costume convidalos a toos a una cena que llamabase la cena’l
gochu, el menú d'esta cena solía ser, sopa de fégadu, arroz con costielles, y
rajes llombu fritu, tou ello acompañáu
de sidre y vinu, dalgún postre caseru, café y llicores. Tamién era costume dar
la preba de la matanza a les persones que pol motivu que fuera nun mataben el
gochu, esta preba xeneralmente consistía nun par de chorizos, un par de
morcielles, un par de sabadiegos y unes costielles.
Mas o menos desta manera ye como yo recuerdo tou lo
relacionau cola matanza’l gochu en Villascusa, nos años 50 y 60 del pasau siglu
XX.
No hay comentarios:
Publicar un comentario