Fai años, los horros y les
paneres, eren unes de les edificaciones
más importantes nos pueblos y aldees d'Asturies, el so orixen data de dellos
sieglos tras, los horros son cuadraos y tán sofitaos sobre cuatro pegollos, les
paneres son rectangulares y tán sofitaes sobre seis pegollos, nellos guardabense los productos de la cosecha, les
patates, les fabes, les mazanes, les castañes,
les nueces, y otros munchos productos,
tamién se guardaben los productos de la matanza del gochu, xamones, llacones,
chorizos y morcielles, toos estos productos calteníense perfectamente nel horru o na panera pos al tar aislláu del
suelu taba llibre de mugores y a salvo de ratas y ratones yá que pola mesma
construcción del horru yéra-yos imposible aceder al mesmu.
Alredor, los horros y paneres tienen un corredor llamáu
la tenobia, nella poníense a ensugar
dellos productos cuando se recoyíen, ente ellos podemos citar les fabes
y les riestras de panoyes de maíz y l'espaciu debaxu del horru aprovechabase pa
guardar protexíos de l'agua dellos preseos de la llabranza como'l carru, el
llabiegu, el rastru, etc. Hoy en dia esti espaciu debaxu los horros sirve de
garaje y guárdense ellí los coches.
Na actualidá los horros y paneres
tán en peligru de desapaecer, pos col despoblamientu de los pueblos,
l'avieyamientu de la xente que vive nellos y les nueves formes de vida, son menos necesarios y a veces vanse deteriorando
y dalgunos derrúmbense yá que el so caltenimientu resulta bien gravosu pa los
sos propietarios y anque les alministraciones publiques ufierten delles
subvenciones pal so caltenimientu na mayoría de los casos son demasiáu pequenes y nun compensa la
so restauración.
Nel siguiente croquis pueen vese
les distintes partes y pieces que componen l'horru, supongo qu'a muncha xente,
como m'asocede a mi, sonáren-yos munches d'elles y otres seguramente menos, pero bueno equí tán toes.
33038
No hay comentarios:
Publicar un comentario