Cuentos y leyendas: El ñeru de Chacalandran

Voi cuntar hoy una anécdota de la que yo fui protagonista cuando era nenu y vivía en Villaescusa, el pueblu onde naci, a través d'ella quiero rindir un sencillu homenaxe a les  persones mayores que naquellos lexanos tiempos vivíen en Villaescusa y en tolos de mas pueblos de la rodiada.

Estes persones trabayaben duramente pos carecíen  de cualesquier de les ayudes que na actualidá tienen les xentes que se dediquen a los llabores del campu, naquellos tiempos nun había maquinas de segar, la herba y la pación había que segala cola guadaña, y como tampoco había tractores,  había qu'acarretala con carros del país y munches veces, sobremanera la pación acarretabase al costazu, bien utilizando la macona que era una cesta grande fecha de banielles y que faíen los cesteros o bien a cargues.

Como digo, esta xente trabayaba duru pero  nun se sentíen infelices por ello, casi nunca teníen priesa y siempre teníen tiempu pa charlar colos sos vecinos, a munchos d'ellos gustába-yos cuntar cuentos y hestories y esto facia que los más pequeños andáremos siempre detrás d'ellos.

Cuando yo yera nenu, una de les coses que más me gustaben, lo mesmu que a otros rapaces de la mio eda, era andar detrás de los páxaros p'alcontrar onde facíen el ñeru, cuando poníen los güevos y más tarde salíen los paxarinos.

Un día que taba yo nel Campu cerca d'onde vivía, llego ellí un paisanu con una carga de pación, venia d'una finca cerca de la fuente L’Aceu, cuando llego al campu sofito la carga de pación pa descansar un pocu y empezó a hablar conmigo, preguntome qué taba faciendo, yo díxi-y qu'andaba buscando ñeros, entós díxome, que pena que nun tuvieres conmigo porque mientres segaba la pación alcontre un ñeru de Chacalandran, yo escuchabalu embobau pos naturalmente nunca oyera hablar de semexante páxaru, yo pregúnte-y onde taba'l ñeru, el dixome que taba na so finca nun sucu y que lo alcontro porque al segar la pación salió'l Chacalandran grande esnalando, entós fui con cuidau y atope el ñeru que tenia Chacalandrinos, que yá eren  abondu grandes y taben próximos a abandonar el ñeru,

El paisanu despidiose de mi y continuo cola so carga de pación, naquel momentu, creí tou lo que me dixo aquel paisanu y quédeme arrenegando de la mio mala suerte al nun poder ver aquel dichosu ñeru.  

Más alantre yá entendí que tou lo que me conto aquel paisanu era un cuentu, pos nun había nengún páxaru llamáu Chacalandran y polo tantu nun podía haber nengún ñeru con Chacalandrinos, sin embargo yo nunca olvide esta hestoria.

N'homenaxe y alcordanza de les persones de Villaescusa yá finaes que cuando yo yera nenu cuntáronme munchos cuentos y hestories
35580