El Gachapu

Voi empecipiar güei una serie d'entraes nesti blog nes que tratare de describir anque sea someramente dellos instrumentos ferramientes y preseos que na actualida tán prácticamente en desusu pero que d'antiguo yeren utilizaos  poles xentes que vivíen en Villaescusa y otros pueblos del conceyu de Colunga. Vamos empezar falando del gachapu.

El gachapu, básicamente ye un recipiente fechu d'una sola pieza de madera, la utilidá del gachapu yera llevar la piedra d'afilar la guadaña, echábase-y nel so interior un pocu d'agua pa que la piedra estubiese siempre moyada y afilara meyor, dalguna xente en llugar d'echar agua al gachapu echaben-y  vinagre pa que la piedra estubiera mas aspera y fora mas abrasiva  a la hora d'afilar, había gachapos de distintes formes, redondos, cuadraos mas grandes o mas pequeños, unes veces fechos toscamente y otres fechos con munchu percuru, dalgunos inclusive con talles alegóriques a les xeres del campu u otres talles que en dalgunos casos podíen considerase verdaderes obres d'arte.

Los gachapos facianlos xeneralmente los madreñeros utilizando pa ello dalgunes de les ferramientes que usaben pa faer les madreñes, de fechu cuando daquién llevaba unes madreñes feches toscamente, la xente dicía lleves unes madreñes que paecen dos gachapos.

El segador colgaba'l gachapu   de la petrina y cuando  taba segando, a intervalos regulares parábase, sacaba la piedra del gachapu y afilaba la gadaña.

El gachapu que ilustra esta historia fexolu  fai mas venticinco años un artesanu de Sales, que se llamaba Rogelio Pardo, como atestigüen les sos inicales grabaes sobre'l mesmu y que era un verdaderu artista de la madera, fexolu non ya pa usalu como tal si non mas bien pa usalu como adornu.

Segaor que tas segando 

debaxu de la borrina

si non corta la guadaña
saca la piedra y afila

43035