lunes, 29 de octubre de 2012

Les madreñes

Un par de madreñes

Como en tolos demas pueblos del conceyu de Colunga y polo xeneral de toa Asturies, en Villaescusa les  madreñes yera el calzáu mas utilizáu sobremanera pel iviernu, les madreñes al tar feches de madera yera un calzáu bien afayaizu pa transitar pelos antiguos caminos llenos de charcos y barru, calzabanse con zapatielles y calteníen el pie secu y caliente, al llegar a casa dexábense fuera, naturalmente a techu, colo que nun s'emporcaba la casa.

Les madreñes facienles los madreñeros, había madreñeros    profesionales que dedicabense solamente ha facer madreñes y vendianles a la xente de los pueblos cercanos ó nos mercaos selmanales, tamién había persones qu'ensin ser madreñeros,  sabíen facer madreñes  y de fechu facienles pa la xente de la so casa y de esta manera nun teníen que mercales, esta llabor facienla pel iviernu ó en díes d'agua cuando non  podíen facese otros llabores de la vida diaria, voi tratar de describir cual yera'l procesu de fabricación de les madreñes. 

Esti procesu empezaba cuando'l madreñeru provistu de hachu y tronzador iba pal monte y cortaba los arboles mas adecuaos pa facer les madreñes, estos arboles xeneralmente yeren abedurios, umeros ó castañares,  una vez cortaos había que dexalos secar totalmente antes d'utilizalos, esti procesu duraba aprosimau un añu, asi qu'había que cortar esti añu la madera pa facer les madreñes el próximu.
Ferramientes del madreñeru


Cuando la madera taba totalmente seca cortabase en cachos del  llargor de la madreña mas o menos cuarenta centímetros, dempués dependiendo de la grosez  partianse en dos ó cuatro cada unu pa faer una madreña. El madreñeru coyía unu d'estos cachos y col hachu empezaba a da-y forma esti llabor llamábase estamazar la madreña, cuando terminaba, el cachu de madera yá tenia mas o menos la forma externa d'una madreña, de siguío y utilizando la zuela siguía dándo-y forma enseguida diben apereciendo los trés pies de la madreña y empezaba a vaciar  la parte descubierta de la mesma ayudandose  para ello amás de la zuela  de la gubia y el macete.

La madreña yá tien la so forma esterna y esta vaciada na so parte descubierta, agora'l madreñeru  suxetala nel so bancu, llamau potru del madreñeru y empieza a vaciar la parte delantera de la madreña utilizando pa ello varios taladros, la terminación del interior de la madreña consíguese utilizando una ferramienta llamada llegra, de la cual el madreñeru tenia varios tipos dependiendo de la zana de la madreña a trabayar, coles llegres nel interior y el raseru ó raspon nel esterior iba dexándo les parées de la madreña de la grosez fayadiza para que sea abondu fuerte ensin resultar demasiáu pesada.
Faciendo madreñes

Solamente falta lijar, decorar, pintar y ferrar la madreña, el lijau faciase con papel de lija de forma manual ó con una llixadora artesanal movida a pedal, el docorau consistía en tallar na parte delantera cimera de la madreña, dalgunos motivos como hojas, ramos ó rosetes de diversos tipos, el ferráu consistía n'asitiar en cada pie de la madreña un clavu o una goma pa evitar la escesiva gastadura
Esti yera a grandes rasgos y basau nes mis propies alcordances, el procesu artesanal por el cual el madreñeru, facia les madreñes.




No hay comentarios: