martes, 20 de noviembre de 2012

CUENTOS Y LEYENDES: PIEDRES CON TOCIN Y MAYULLARGU


Nes décades de los años 40 y 50 del pasáu sieglu XX, dempues de la Guerra Civil, había munches persones probes que pa subsistir  víense obligaes a vivir de la caridá pública, munchos d'ellos diben de pueblu en pueblu y de casa en casa, pidiendo llimosna, nuna casa pidien un platu comida, n'otra pidien posada, delles veces  facíen dalgún trabayu, como por casu cortar lleñe, en cuenta de comida y posada, d'esta forma diben malviviendo. Nel añu 1954 el gobiernu de Franco modifico la llamada  ley de bagos y maleantes del añu 1933, incluyendo nella  y polo tantu prohibiendo la mendicida y los mendigos, la xente dicia lo bien que diba España porque ya non habia probes, cuando la verda yera que non podien pidir pues si los pillaba la Guardia Civil detenialos y encerrabalos.

Estos dos cuentos escúchelos  cuntar en Villaescusa cuando yo yera nenu, a persones yá desaparecies de les que guardo bones alcordances por oyelos cuntar estos y otros munchos cuentos y hestories.
El primeru cunta qu'un día llego un probe a una casa, diba col so sacu al costazu y  na mano llevaba un cazu nel  que llevaba unes cuantes piedres, picó na puerte y cuando-y abrieron pidió si podíen da-y un pocu de tocín pa cocer coles piedres que llevaba nel cazu, la xente de la casa sosprendióse ante aquel pidimientu tan raru d'aquel probe y pensaron que nun taba bien de la cabeza.

¡¡¡Pero home usté nun ta bien de la cabeza!!!,
¿como va uste  cocer  piedre con tocín oh?                                                                                                                     

Llevo tou’l día ensin comer, ustedes denme un pocu de tocín y yo cocinarelo con estes piedres equí mesmu.
Ante la insistencia del probe y un pocu movíos pol interés de ver como cocinaba les piedres col tocín dieron-y el tocín que pidía.
Namás que el probe tubu'l tocín echolu nel cazu onde tenía les piedres, removiolo tou bien, añadió agua,  un pocu de sal y punxo el cazu al fueu, tuvo un buen ratu cocinando les piedres col tocín, cuando considero que'l guisu taba nel so puntu retirolo del fueu y empezó a comer el tocín acompañáu con un cachu de pan que traía nel so sacu.
Al velo la xente de la casa entendieron que fueren víctimes del probe que se valió d'esta estrataxema pa que-y dieren el tocín y asina poder comer daqué

N'otra ocasión nuna casa fixeron el samartín, ye dicir mataron el gochu, escuartizarenlu, fixeron los chorizos, les morcielles, los sabadiegos y el restu de la carne del gochu incluyíos los xamones y los llacones metieronlos en sal que yera la forma tradicional de conserbalo durante tol añu.
Una vez termináu'l periodu de salazón, l’ama de la casa coyó'l meyor de los xamones y dixo al restu de la familia, bonu esti vamos dexalu pa mayu llargu, con esti dichu lo que quería dicir yera que'l mes de mayu yera un mes d'enforma trabayu, los díes yeren bien grandes y yera cuando se semaba la collecha, polo que yera bonu guardar aquel xamón pa esa dómina, pa tener una alimentación suplementaria.
Desgraciadamente na casa vivía una muyer yá abondo mayor y que nun yera del tou cuerda, nuna ocasión que taba esta muyer sola na casa picaren a la puerte, miro pela ventana y vio qu'el que llamaba yera un probe que venía pidiendo llimosna, abrió la puerte  y sosprendióse al ver que'l probe yera un paisanu bien altu, midiría cerca de dos metros, al velu tan altu alcordóse del dichu de l’ama de la casa, y pregúnto-y al probe.      

¿oya señor?     ¿usté nun  sera por casualidá Mayullargu?,  

al escuchar esta pregunta'l probe entendió que la muyer nun tenía que tar nel so sanu juicio,  decidió sigui-y la corriente y contésto-y,    

si señora si,  yo soi Mayullargu,  asina me llamen pola mio estatura,     

a bonu,  dixo la muyer,  pos entós espere un pocu que tengo que da-y un xamón que guardamos pa usté, la muyer fui a buscar el xamón y dioilu al probe que marcho encantáu de la vida col xamon que aquella familia guardaba pal mes de mayu que yera domina de munchu trabayu y convenía  tomar alimentos de gran poder enerxeticu.

.
En memoria y recuerdu, de les persones de Villaescusa ya desaparecies, a les que yo escucheyos cuntar estos y otros munchos cuentos y hestories.





No hay comentarios: