lunes, 8 de abril de 2013

La elaboración artesanal de la sidre


Güei  voi tratar de describir de manera muy resumia los trabayos y llabores relacionaos col procesu artesanal de la elaboración de la sidre tal como se facía en Villaescusa y otros pueblos del conceyu de Colunga na década de los años sesenta del pasáu sieglu XX, tou ello basáu nes mios propies vivencies y alcordances y polo tantu suxetu a posibles errores polos cuales de antemano pido disculpes.
A finales del mes d'ochobre yera cuando s'empezaben los preparativos pa la ellaboración de la sidre, una de les primeres coses qu'había que facer yera preparar el llagar, lo cual consistía nuna revisión minuciosa de toes los sos partes y l'arreglu de cualesquier desperfectu que pudiera tener, tamién había que realizar una esmerada llimpieza del mesmu, sobremanera les partes que diben tar en contactu cola mazana  ó la sidre como son la era del llagar que ye la base onde se deposita la mazana una vez mayada y les tables coles que se forma'l caxón que la contien, llamaes bastidores.
Otru llabor que había que facer, yera preparar los cascos, barriles, barriques y pipes que diben contener la sidre durante el procesu de la so fermentación, amás d'una rigorosa llimpieza, había qu'asegurase de que nun tuvieren nenguna fuga, pa ello llenabense d'agua y dexabanse dellos dis pa que la madera inchara y cerrara tolos poros. Una vez que tou taba preparáu empezbase a  recoyer les mazanes, pa ello tola familia diba pa la pumarada, movíense los pumares pa que cayeren les mazanes y de siguío  pañabense y echabense en sacos, cuando se terminaben de recoyer llevabense hasta la casa utilizando pa ello'l carru`l país ó al llombu de caballeríes, dacuando estos llabores realizanse pol procedimientu de la andecha, pola  cual ca día tolos vecinos del pueblu, recoyíen les mazanes d'unu d'ellos.

Na segunda quincena del mes de noviembre, cola mazana yá recoyia y el llagar y los cascos preparaos, yera cuando se empezaba a mayar la mazana pa facer la sidre, esti llabor solía facese al atapecer ó inclusive pela nueche y siempres se faía de andecha pos requerianse ente cuatro y ocho mayadores pa realizala, utilizabase pa ello una desca, ó duerna que yera una especie de masera fecha d'un gruesu tueru de madera convenientemente vaciáu y los mayos que yeren unos tacos redondos de madera d'unos 35 centímetros de llargu y unos 20 centímetros de diámetru, terminaos con un mangu vertical d'aprosimadamente 1,5 metros. 

Los mayadores cada unu col so mayu asitiábense a entrambos llaos de la desca sobre esta echabase una cantidá de mazanes proporcional al so tamañu y los mayadores colos sos mayos  a base de golpes acompasaos al unísonu diben machucando les mazanes, cuando taben abondo machucaes y utilizando una pala de madera echabase la mazana machucada al llagar, esta rutina ripitiase hasta que se terminaben les mazanes ó  se llenába'l llagar.

La mazana mayada dexabase nel llagar unu ó dos dis, esto facíase así, pa que terminara d'ablandiase y soltara meyor el so zumu, trescurríos estos dis empezabase a prensar la mazana mayada, pa ello cubríase con unos tablones de la llongura interior del caxón que contenía la mazana y d'aprosimadamente cinco centímetro d'espesura llamaos los verdugos y sobre estos asitiábense los carneros, que yeren unos gruesos tacos tamién de madera y del anchu del caxón d'aprosimadamente 25 X 25 centímetros, sobre los que s'aplicaba diretamente la presión proveniente de la viga  del llagar  impulsada a su vez  pol fusu, namás empezar a aplicar presión, la sidre empezaba a salir con fuerza, esta sidre recoyiase  nun recipiente 

tamién de madera llamáu el duernu, de ahí  la espresión sidra del duernu, con la que se denomina la sidre enantes de fermentar.
 La sidra recoyia nel duernu per mediu d'una xarra fecha de madera llamada la zapica y díbase echando nuna especie de cubu tamién de madera llamau la ferrada, cuando s'enllenaba la ferrada, al traviés d'un embudu, tamién de madera, diba echándose nos cascos, barriles y barriques onde se diba a realizar el procesu de fermentadura, esti procesu estendiase hasta los meses de marzu ó abril, cuando se procedía a  corchar la sidre, llabor que consistía en pasar la sidre dende les barriques a les botelles y tapales con corchos. Como puede vese, nel procesu d'ellaboración de la sidra, tolos materiales ya instrumentos que s'utilizaben yeren de madera, pos según la sabiduría popular, nin la mazana nin la sidre teníen de tocar material dalguno distintu de la madera nel so procesu de elaboración, na actualidá esto cambió abondo, los llagares yá nun son puramente de madera sinón qu'enforma de los sos partes son metáliques, yá nun s'utilicen les descas ó duernas, nin los mayos, la mazana triturase en molinos movíos por enerxía eléctrica llamaos mayadoras, tocantes a los cascos amás de los de madera hailos tamien d'aceru inoxidable y tamién de dalgún otru material como'l PVC, etc. Más o menos d'esta forma ye como yo recuerdo tol procesu d'ellaboración de la sidre, nesti casu nel pueblu de Villaescusa que ye onde yo nací.





No hay comentarios: