viernes, 26 de enero de 2018

Villaescusa


Tolos que me conocen, yá sea porque me conocen dende siempre, o bien los que me conocen al traviés de les mios coses n'Internet o nes Redes Sociales, de sobra saben que soi de Villaescusa, esi pequenu pueblu que pertenez alministrativamente a la parroquia de Pernús y al conceyu de Colunga, yá que con cierta frecuencia reivindicolo por sentime argullosu de los mios oríxenes.

Como digo yo naci en Villaescusa y de Villaescusa eren tolos mios antepasaos paternos dende los mios tatarabuelos y de la parroquia de Pivierda, anque de llugares bien cercanos a Villaescusa los maternos. 

Yo solamente viví en Villaescusa los primeres 17 años de la mio vida, pero esos años de la infancia y la primer mocedá creo que son los que marquen a una persona pa siempres, los llugares, los nomes de los sitios, les persones d'aquella dómina, la mayoria yá sumíes, les andeches, les esbilles, les sextaferies, les tertulies de los mayores debaxu'l horru, les cases de los vecinos y bien de mas coses de les que me alcuerdo y que creo que nun olvidare mientres viva.

Ahora nun me queden en Villaescusa familiares, pos el pasu inexorable del tiempu pocu apocu fui borrandolos a toos, pero, quédame daqué bien importante, que son los amigos y amigues, persones que nacieron en Villaescusa y ellí vivieron siempres, otres  que como yo nacimos en Villaescusa y abandonamos el pueblu pa buscanos la vida n'otros llugares y dalgunos otros que tamién dexaron el pueblu y qu'agora, una vez xubilaos gústa-yos tornar a Villaescusa y pasar ellí algunes temporaes.

El siguiente video muestra unes vistes aérees de Villaescusa y de dellos llugares entrañables pa mi.
98965

No hay comentarios: