Los cestos eren unos utensilios imprescindibles nos llabores del campu nos pueblos y aldees
de Asturies, en Villaescusa y demás pueblos del conceyu de Colunga, utilizábense
a diariu en munches tares habituales del día a día, cada un dependiendo de la so
forma y tamañu utilizase pa un llabor determináu.
Los cesteros eren quienes los faíen con banielles, que eren unes llámines de madera de trés a cinco
centímetro d'anchu y dos o tres milímetro de grosez y que los cesteros sacaben
de palos d'ablanar y d'otres clases de madera.
Polo xeneral los cesteros nun se dedicaben profesionalmente a
facer cestos, sinón que eren unes presones qu'amás de trabayar nos llabores del
campu, durante’l iviernu, cuando había menos llabores que facer, dedicabense a
facer cestos que dempués vendíen nos mercaos, llogrando con ello unos ingresos
que complementaben la economía familiar.
Cerca de Villaescusa, en Bucial, vivía Falo, que era un d'estos
cesteros, cuando yo era nenu alcuerdome de
ver a Falo na so casa de Bucial, faciendo cestos, que dempués vendía los
xueves nel mercau selmanal de Colunga.
Basándome nes mies propies alcordances, voi faer una
clasificación de los tipos de cestos que yo conocí, teniendo en cuenta'l so
tamañu y el llabor pal que se usaben.
EL MACON: El Macon era
un cestu bien grande d'aprosimao un metro de diámetru y un metro d'altor,
utilizase na recoyia de ceberes, básicamente
trigu o centenu, nel, diben echándose les espigues que se recoyíen con unes
ferramientes llamaes les mesories.
LA MACONA: La Macona era una cesta más pequena qu'El Macon,
d'unos 70 centímetros de diámetru y 70 centímetros d'altor, usábase sobremanera
pa tresportar la pación o la herba pal
ganáu.
EL FAXIN O CESTU DE
CARRETERU: El Faxin era un cestu
d'alredor de 50 centimetros de diámetru y 50 centímetros d'altor, utilizabase
pa tresportar al costazu diversos materiales, ente ellos tierra, cuando había
que aterrar, esto ye, nes finques cuestes xubir tierra de la parte inferior a
la cimera, tamién los utilizaben los camineros que eren los que s'encargaben de
caltener les carreteres en buen estau pa tresportar la gravilla.
LA MANIEGA: La Maniega era una cesta de forma rectangular,
d'unos 70 centímetros de llongura por 40 d'anchu y 40 d'altor, usabase en
múltiples llabores ente elles llevar la lleña picau dende'l picaderu hasta la
cocina.
CESTU DE ORICIAR: El
Cestu de Oriciar, tenía un tamañu paecíu al Faxin, pero esti con un asa en
forma d'arcu, utilizase pa recoyer los oricios nel tiempu les castañes, los oricios coyiense con unes
tiñaces feches de madera, diben echándose al cestu y cuando esti s’enllenaba
llevabense a la cuerra onde se dexaben pa que morcaren.
EL CESTU COPIN: El Cestu Copin era un cestu que s'utilizaba principalmente
como midida de capacidá, nel cabíen ocho kilos y usábase pa midir les fabes, les
castañes, les patates, etc; tenia un asa en forma de arcu.
EL CESTU GALIPU: Era como'l Cestu Copin, el Cestu Galipu
utilizábase tamien como midia, la so capacidá era la metá del Cestu Copin, ósea
cuatro kilos y utilizábase de la mesma formay pa los mesmos fines.
.
Había otros cestos que nun taben fechos de banielles, sinón
que taba fechos de verdasques de ablanar entretejies ente si, d'ellos podemos destacar El Paxu, que era un cestu del tamañu de La
Macona y que s'utilizaba pa los mesmos fines.
Tamién había otros cestos digamos de mas luxu que
s'utilizaben pa coses más fines, como por casu pa llevar la comida a los praos
en tiempu la herba o a les fiestes y
romeríes cuando se diba a elles de merienda, estos cestos taben fechos de verdasques de brimal, facienlos xeneralmente
los gitanos y dempués vendienlos polos pueblos y dacuando cambiabnlos por
comida.
Anque toos estos cestos teníen una función determinada, nun
quier dicir que siempre s'utilizaren pal
fin previstu, sinón que munches veces usabense unos cestos pa la función
d'otros, dependiendo de la disponibilidad y les necesidaes del momentu.
No homenaxe a tolos cesteros, y a toles presones
que meyor o peor, facíen dalgún tipu de cestu, y a toos aquellos qu'antes d'apaecer los recipientes de
plásticu, utilizaron los distintos tipos de cestos nel so trabayu diariu
34050
