El Calendariu Zaragozanu era por demás popular ente la xente que vivía nos pueblos y aldees d'Asturies, en Villascusa en cai toles cases tenien esti pequenu llibrín qu'amás de calendariu traía'l santoral completu, los pronósticos del tiempu pa tol añu, les fases de la lluna, la fecha de toles feries y mercaos d'España, a mas de munchos refranes, curiosidaes y dichos populares, siempre rellacionaos cola agricultura y cola vida nel campu.
Lo que más interesaba del Calendariu Zaragozanu, eren los pronósticos del tiempu, pos como ye natural, el tiempu influyía enforma nel desenvolvimientu de los llabores del campu, cuando llegaba la hora de semar les fabes, el maíz les patates etc, consultábase'l Zaragozanu a ver que tiempu fadría los próximos díes, pos según dicíase era bien importante que llevaren bona sazón, ye dicir nun era bonu que lloviera justu dempués de d'efectuar la siembra, pos pa ñacer les simientes precisaben calor, pero si era bonu que cayera daqué d'agua unos cuantos díes dempués de la sementera, pa qu'una vez ñacies, l'agua ayudara al so rápido crecimientu.
Los pronósticos del tiempu qu'ufiertaba'l Calendariu Zaragozanu eren bien xenerales y polo tantu munches veces pocu fiables, pero a falta d'otra información la xente tenialos en cuenta, anque tamién se fiaben enforma de la so intuición, de la sabiduría popular y de dellos refranes qu'en función del tiempu que facia trataben de predicir como seria'l tiempu nos próximos díes.
Na actualidá'l Calendariu Zaragozanu sigue editándose y vendiendose, anque'l so espardimientu ye bien menor que antes, nos pueblos hai muncha menos xente, y l'abondosa información de que se dispon anguaño, facenlu innecesariu, en sin embargu, muncha xente sigue mercando esti calendariu por costume, por tradición, porque siempre lu vieren per casa o porque lo mercaben los sos padres o güelos.
37067
37067
No hay comentarios:
Publicar un comentario