CUENTOS Y LEYENDAS: EL XASTRE

         
Esti cuentu forma parte de la gran cantidá de cuentos y lleendes que fai yá bastantes años cuntabense nos pueblos y aldees d'Asturies cuando los vecinos axuntábense en casa de dalgún d'ellos durante les llargues nueches d'iviernu. 
Cunta la hestoria d'un xastre que se ganaba la vida diendo de pueblu en pueblu cola so maquina de coser al costazu ufiertando los sos servicios pa cortar, iguar y arreglar toa clase prendes de vistir en cuenta de la comida, la posada y una pequena cantidá de dineru.

Nuna ocasión llego a un  pueblu del conceyu de Colunga, y atopó trabayu nuna casa del pueblu como siempre alcordó co'l ama de la casa, que'l iguaría-y les prendes de vistir qu'ella dixera en cuenta de la comida, la posada y daqué de dineru.

A la mañana siguiente la dueña de la casa dio-y al xastre p'almorzar un güevu fritu, el xastre comiolu y dempués empezó a preparar tou pa empezar el so trabayu, saco de la maleta la vieya maquina de coser, puxola enriba d'una mesa, avero una siella, sentóse, saco d'una caxa los filos, les tisories, enebro la maquina de coser, pero tou esto fexolo de forma muy lenta, la dueña de la casa diose cuenta d'esto, pero nun le dio mayor importancia y pensó que seria por cuenta de que'l xastre era bien meticulosu nel so trabayu.
Al  fin empezó a coser, pero d'una manera tamién muy lenta coles mesmes que polo bajini cantaba un monótonu cantar, la dueña de la casa nun entendía nada y pensaba que a esi pasu tendría que caltener al xastre por enforma tiempu, disimuladamente averose al xastre a ver si podía escuchar lo que cantaba mientres cosía lentamente, al fin pudo escuchar que la lletra del cantar era .

Un güevu un güevu ye………un güevu un güevu ye……..un güevu un güevu ye……

A la mañana siguiente la dueña de la casa dio-y al xastre p'almorzar dos güevos fritos, cuando empezó a coser facialo mas apriesa que'l día anterior y mientres cosía siguía cantando'l cantar, pero agora con un ritmu mas rápido, a la dueña de la casa paecía-y que ainda cosía demasiau lentu, avérose y escucho que la lletra del cantar dicía,

Dos güevos…. dos güevos son….dos güevos dos güevos son…..dos güevos dos güevos son.

Al tercer día la dueña de la casa dio-y al xastre p'almorzar dos güevos fritos un chorizu y unes lonches de xamón, na mas qu'empezó a coser diose cuenta qu'agora cosía a la velocidá normal y cantaba con allegría y en voz alta, nesti casu la lletra del cantar dicía,.....

Con dos güevos y llonganiza cues el xastre apriesa, ....con dos güevos y llonganiza cues el xastre apriesa........con dos güevos y llonganiza cues el xastre apriesa.

Esta fui la manera en qu'el xastre dio-y a entender a la dueña de la casa que si quería que'l trabayara rápidu y bien, tendría que da-y bien de comer, de lo contrariu trabayaría mas despaciu y tendría que caltenelu mientres enforma mas tiempu.

En memoria y alcordanza de toles persones de Villaescusa yá finaes, a les que cuando yo era nenu escuche-yos  cuntar esti y otros munchos cuentos y hestories.