La Fuente L'Acéu y el Llavaderu de La Riega

Voi escribir güei d'una fuente y de un llavaderu emblemáticos nel pueblu de Villascusa, esta fuente ta asitiada al norte de Villascusa, en nun de los caminos que dende Villascusa baxaben hasta Pernús, desconozo en qué estáu s'atopara na actualidá pero imaxino que va tar totalmente abandonada y cubierta pola maleza.

Antes de les obres de la traida de l'agua a Villascusa,    cosa qu'asocedió nos primeros años de la década de los 70 del pasáu sieglu XX, esta era  la principal fuente de la que s'abastecía'l pueblu, tolos vecinos que nun teníen algibe, teníen que dir buscar l'agua a esta fuente, y los que lu tenien tamien diven por ella pal consumu humanu, recuerdo ver a delles muyeres del pueblu, dir  a la fuente con tres calderos y traelos llenos d'agua uno en cada mano y otru na cabeza.

Los mas pequños, nenes y nenos, tamien contribuien diendo a buscar  agua de vez en cuando, sobremanera cuando se  taba sallando ó arrendando’l maíz y tamien en tiempu la herba, eren ellos los encargaos de traer agua pa mitigar la sede d’esta xente que taba trabayando a plenu sol.

L’agua de la fuente L’Aceu era muy estimada pal consumu humanu, pues según dicia la xente podies beber toda la que quisieres porque nun te facia dañu, inclusu había un dichu ó refrán que dicía de esta manera. 

“Si tas sallando’l maíz y tienes seca la garganta, vete a la fuente L’Acéu  y bebi un buen tragu d’agua”.

Nesta fuente había tamién un bebederu onde había que llevar el ganáu a l'agua, sobre tou pel branu cuando otros manantiales se secaben, el camin que diva a la fuente, non era demasiau anchu y a veces cuando el ganáu de un vecin que venia de la fuente, atopabase col de otru que diva era un verdaderu problema el separalo y por ello era necesariu procurar que esto non sucediera.

Cerca d'esta fuente había tamién un llavaderu, el Llavaderu de La Riega, a esti llavaderu, lo mesmo que nel casu de la fuente, diben les muyeres del pueblu a llavar la ropa,  pa ello poníen la ropa suciu nun barcal y ponianlu na cabeza, protexida esta, por un rodiellu fechu de trapu que llamabase'l ruenu, baxaben hasta'l llavaderu, llavaben la ropa y tornaben  de nuevu al pueblu.

Eren aquellos unos años de duru trabayu, sobremanera pa estes muyeres qu'amás de trabayar en toles faenes del campu, teníen que abastecer les sos cases de agua d’esta fuente y dir a llavar la ropa a esti llavaderu.

Sirvan estes linies como un pequeñu recuerdu tantu de la Fuente L’Aceu como del Llavaderu de  La Riega, güei abandonaes y pa munchos deconocies, pero que nel so tiempu emprestaron un gran serviciu al pueblu de Villaescusa y tamién como homenaxe a toles persones, sobremanera muyeres, que durante munchos años baxaron a buscar agua a esta fuente y a llavar la  ropa a esti llavaderu.